Waldo Williams: Un funud fach

 

 

https://www.youtube.com/watch?v=kuxIzYVoxJA 

 

 

Un funud fach cyn elo’r haul o’r wybren,

 

Un funud fwyn cyn delo’r hwyr i’w hynt,

 

I gofio am y pethau anghofiedig

 

Ar goll yn awr yn llwch yr amser gynt.

 

 

Fel ewyn ton a dyr ar draethell unig,

 

Fel cân y gwynt lle nid oes glust a glyw,

 

Mì wn eu bod yn galw’n ofer arnom –

 

Hen bethau anghofiedig dynol ryw.

 

 

 

Camp a chelfyddyd y cenhedloedd cynnar,

 

Aneddau bychain a neuaddau mawr,

 

Y chwedlau cain a chwalwyd ers canrifoedd

 

Y duwiau na ŵyr neb amdanynt ‘nawr.

 

 

 

A geiriau bach hen ieithoedd diflanedig,

 

Hoyw yng ngenau dynion oeddynt hwy,

 

A thlws i’r clust ym mharabl plant bychaìn,

 

Ond tafod neb ni eilw arnynt mwy.

 

 

O, genedlaethau dirifedi daear,

 

A’u breuddwyd dwyfol a’u dwyfoldeb brau,

 

A erys ond tawelwch i’r calonnau

 

Fu gynt yn llawenychu a thristáu?

 

 

Mynych ym mrig yr hwyr, a mi yn unig,

 

Daw hiraeth am eich ‘nabod chwi bob un;

 

A oes a’ch deil o hyd mewn Cof a Chalon,

 

Hen bethau anghofiedig teulu dyn?

 

 

Nodiadau

Cyn elo .......cyn delo      [cyn aiff....cyn daw]  Mae WW yn defnyddio’r modd dibynnol (subjunctive) yn dilyn cyn.

Wybren – awyr

A dyr – sy’n torri

Traethell – traeth bach

A glyw – sy’n clywed

Annedd - cartref

Cain – fine (well-crafted)

Chwalu – scatter....mynd ar goll

Hoyw – bywiog, sionc

Genau – cegau (jaws)

Ni eilw – ddim yn galw

Dirifedi – di-rif, countless

Dywfol – divine, sacred

Dywfoldeb – sanctity

Brau – bregus (brittle, fragile)

A erys – arhosith

Llawenychu (llawenhau) – bod yn llawen

Mynych – aml

Ym mrig yr hwyr – wrth iddi nosi

A oes a’ch deil..... Is there a heart or memory still to cherish? (a oes yna rywbeth rydych yn ei gadw yn eich cof a’ch calon)