35 Diwrnod - cyfrinachau tywyll

Dyn yn cwympo i'w farwolaeth o ffenestr swyddfa cwmni yswiriant – dyna fydd golygfa gyntaf iasoer y gyfres ddirgel 35 Diwrnod ei darlledu nos Sul 8 Tachwedd ar S4C.

Mae'r gyfres wedi'i chynhyrchu gan Boom Cymru ac wedi'i ffilmio mewn amryw o leoliadau yng nghanol Caerdydd, gan gynnwys swyddfa ger Heol y Santes Fair a gerddi Parc Bute, wrth ymyl Castell Caerdydd.

Mae'r swyddfa, prif leoliad y golygfeydd, yn delio a thwyll yswiriant yng nghanol dinas ac mae straeon y cymeriadau yn clymu a'i gilydd wrth ddatgelu cyfrinachau tywyll.

Ar ddechrau'r bennod gyntaf, byddwn yn gweld Simon Jones yn cwympo i'w farwolaeth. Yn syth, byddwn yn cael ein tywys yn ôl 35 diwrnod ynghynt wrth i Simon, heb yn wybod i'w hunan, ddechrau cyfri'r dyddiau tan ei farwolaeth ei hun.

"Yn y ddrama hon, y gwylwyr sy'n chwarae rôl y ditectif, yn casglu tystiolaeth ac yn ceisio dod i gasgliad eu hunain," meddai Mark Flanagan, sy'n chwarae'r brif ran fel cymeriad Simon.

"Mae hi'n gysyniad cyffrous wrth i'r gwylwyr ddatblygu eu damcaniaethau nhw am bwy sy'n gyfrifol am y llofrudd a pham. Ar yr arwyneb mae pawb yn ymddangos fel cydweithwyr bodlon ond oes unrhyw un yn y swyddfa yn onest gyda'i gilydd? Gwyliwch i ffeindio allan!"

Mae cast y gyfres yn cynnwys wynebau newydd ac adnabyddus gan gynnwys Mark Flanagan, catalydd prif ddigwyddiadau'r gyfres, Simon; Richard Elis; Mair Rowlands; Rhodri Evan; Sion Alun Davies; Lowri Steffan; Nia Roberts a Saran Morgan.

Bydd perthynas Simon a Jeff o dan bwysau aruthrol wrth i gyfrinachau all achosi cryn dipyn o niwed gael eu datgelu yn ystod y gyfres.

"Mae'r swyddfa yn lle anodd i weithio ac mae 'na gweryla a thwyllo yn mynd ymlaen sy'n creu tensiynau amlwg rhwng y cydweithwyr," meddai Richard Elis, sy'n chwarae cymeriad Jeff.

"Mae hefyd perthnasau cryf yn datblygu sy'n naturiol pan mae unigolion yn gweithio'n agos gyda'i gilydd. Bydd y gynulleidfa yn medru uniaethu a rhai o'r cymeriadau ond a fyddan nhw'n medru darganfod pwy yw'r llofrudd?!"

Yr awdures ac enillydd Rose d'Or a BAFTA Cymru Siwan Jones a'r nofelydd a'r sgriptiwr William Owen Roberts sy'n gyfrifol am ysgrifennu wyth bennod y gyfres hon. Y ddau oedd yn gyfrifol am greu ac ysgrifennu'r gyfres gyntaf o 35 Diwrnod hefyd.

Ceir disgrifiad o rai o'r prif gymeriadau yn fan hyn.